点击“学上海话”了解更多精彩内容勿一样个泡饭稿件来源：新民晚报-08-23作者：沈一珠播讲：叶进（上海人民广播电台阿富根）根据音频改编、词语注释：杨张悦、张林龙图/沈一珠前一抢看到勿少讲上海人吃早饭个文章，迭个当中呢提到上海人欢喜吃泡饭。我认为噢，老底仔上海人欢喜吃泡饭嘛，应该是呒没办法呀。从前过日脚啊，勿像现在介宽舒，想屋里吃，开仔煤气灶电磁炉就可以烧；想外头吃，走出去嘛就是饭店点心店。埃歇辰光啊家家人家用一只煤球炉，夜里嘛封脱仔要到明朝早浪向再打开来。所以啦，夜饭呢总归要多烧一点个，一来呢是，夜里向有人来，或者是啥人肚皮饿了，用碗头碗脚个小菜过过冷饭，可以垫垫饥；二来嘛也是因为第二天个一顿早饭呀。早浪向心急慌忙个要出门上班或者读书，冷饭用热开水淘淘，乳腐萝卜头过过，又快又便当。难板改善一下伙食，也就是出去买两根油条回来，剪剪碎，蘸蘸酱油，已经老好了。毕竟嘛当年侪是讲究勤俭节约，呒没啥人会得天天出去吃四大金刚、小馄饨、生煎馒头啊。不过嘛，毕竟是几代人个饮食习惯啊，现在还是有勿少个上海人欢喜泡饭，水煞清，饭滴滑，几化爽气呀。尤其是碰着大热天，夜里向早浪头吃顿冷泡饭，也算是调调胃口了。烧一镬子饭，摆到冷脱，吃个辰光呢盛一块到碗里，热开水淘淘啊。小菜嘛一定要乐惠：荤个，糟带鱼、醉六月黄、蒜泥白切肉各一碟；素个呢，糟毛豆、腌黄瓜、蒸落苏各一碟。一顿夜饭，吃个七八分饱也就可以了。第二天个早饭，还是泡饭。冰箱里向头冰过个饭，有点硬个，嗨，可以来开水里向头滚一滚，盛出来马上吃，辰光一长啦，搿个就黏滋疙瘩变泡饭粥了。过泡饭个菜呀一定勿要马虎：一碟醉麸，有点咸个，吃前头呢用冷开水汏一汏，摆一点绵白糖；一碟黄泥螺，隔夜头里向浸辣辣冷开水里，第二天嘛味道正好；一碟皮蛋，酱麻油白糖拌拌；一碟咸菜毛豆子，搿是百吃勿厌个经典呀；再考究点嘛，可以添一碟糖腌番茄脱仔牛油果吐司个。写到此地嘛，又想起了好朋友前一抢送拨我个私房油酱竹笋。喔唷，有迭能一碟噢，吃一碗泡饭搿是勿够个。词语注释：前一抢（qiyikqian前一段时候）迭个（dhikghek〈代〉这个）欢喜（huoexi①〈动〉喜欢。②〈动〉爱）老底仔（laodizy〈名〉过去，从前）泡饭（’paofhe〈名〉加水煮开后马上熄火，或用滚开水冲泡的米饭，较为爽口。上海人通常用来吃早饭或晚饭）日脚（nikjik日子）介（ga①〈代〉这么。表示程度，修饰形容词。②〈助〉地（限于少数词后））宽舒（kuoesy①〈形〉经济宽裕。②〈形〉住房宽敞。③〈形〉时间不紧。舒读书、尿、输）屋里（okli〈名〉家里）埃歇辰光（exikshenguang那时；当时）明朝（minzao〈名〉明天）早浪向（zaolangxian〈名〉早上，早晨）总归（zonggue〈副〉老，总，总是）萝卜（laobhok因“萝”在老上海话里读“lao”音，直到现今还有许多人将“萝卜读作laobhok，俗写作“老卜”）难板（nebe（副〉偶然，很少）煞清（sakqin〈形〉非常清楚、清洁）几化(jiho〈代〉多少)镬子（whokzy〈名〉锅）落苏（loksu〈名〉茄子）黏滋疙瘩（nizygekdak①东西黏乎乎的。②脾气不爽快）辣辣（laklak在）脱仔（和、与）参考文献：沈一珠.勿一样个泡饭［EB/OL］.